عود احمد

جرت العادة التدوينية ان يعاود المدون كتاباته بعد انقطاع طويل او قصير بتدوينة شبه ثابتة عنوانها يكون فى الغالب وحشتونى جدا جدا جدا , رغم ان ما منعه من الكتابة فى مدونته لم يكن ظرفا قاهرا حال بينه وبين جمهوره العريض , او ظرف مرضى طارىء اقعده عن الكتابة , فربما كان المانع جفافا فى الافكار فى احد الاحوال او على الاغلب هو انشغال فى امر من امور الحياة العادية بما يعنى انه قد نسى خلال هذه الفترة التى انقطع فيها عن الكتابة المدونة والزوار بل وعالم التدوين بالكلية , لكن برضه بيكونوا وحشوه جدا جدا جدا , عموما ربنا يديم المعروف .
المهم انى لاحظت بعد ان ابتعدت عن التدوين الفترة الماضية ثم عدت لم اشعر ان هناك تغير جوهرى حدث فى عالم التدوين , فما زال على حاله , وكأنه قد جمد وأصبح مكررا , الجماعة بتوع الرومانسية لسة بيحبوا على نفسهم , والاخرين المتطلعون للتدوينات الادبية لسة بيقولوا كلام نصه مش مفهوم والنص التانى مالوش معنى , اما السياسيين فمازالوا مرابطين على الثغور يهاجمون الحكومة بلا هوادة ربنا يعينهم , لكن السؤال اللى بيطرح نفسه هو الناس بتدون ليه لغاية دلوقتى؟ يعنى مش حاسس ان فى انقلاب حصل فى حياتنا بسبب التدوين , واشعر ان عالم التدوين يتجه نحو النمطية والتكرار , عموما اكيد كل واحد ليه سببه .
بغض النظر عن كل ما سبق احب اقول بمناسبة عودتى الحميدة للمدونة :

العود احمد والايام ضامنة عقبى النجاح ووعد الله ينتظر