الثلاثاء، 29 يناير، 2008

بنى علمان وحماس

فى مدونة لواحد عالمانى يتمتع بقدرة عالية على السب والبذاءة نشر عدة صورة مصحوبة بالسب واللعن لحماس , ومع قليل من الحقائق وكثير من السفالة والتطاول والتهييج بدأ يؤسس لتبرير اى موقف ممكن الحكومة المصرية تتخذه بتجويع الشعب الفلسطينى , بل واخذ يهاجم الاخوان وكل العاملين فى مجال نصرة الشعب الفلسطينى على اعتبارات ان الفلسطينيين فى غزة اغنياء ومش محتاجين وان الشعب المصرى هو المحتاج وما الى ذلك من الكلام المتهافت الذى تعودناه من العالمانيين ارباب الدعوات الوطنية .
بداية احب اعلق على الصور التى تفضل هذا المدون بوضعها
http://img208.imageshack.us/img208/8865/22249276676734b26382olj9.jpg

هذه الصورة يدعى المدون المحترم ان الذى يحمل الرشاش ويطلق النار هو من حماس اولا وثانيا ان هدفه هو تخويف الجنود المصريين
تعالوا ناخدها بالعقل
اولا مافيش دليل ان دا من حماس لكن وليكن من حماس مش هانختلف كثيراومش مهم تحرى الدقة , لكن لنقل انه من حماس , هل هو بيطلق النار لتخويف الجنود المصريين ولا لتخويف جموع الفلسطينيين الذين كانوا يرشقون الجنود المصريين بالحجارة ؟ هو ادعى انها لتخويف المصريين بدون دليل
لكن انا بقول ان اطلااق النار كان بهدف تفريق المتظاهرين الفلسطينيين وتعالوا ندرس الصورة مع بعض
اولا :الى بيطلق النار دا ظهره للجنود المصريين وبيتجه فى الاتجاه المعاس بقى لو عاوز يخوف المصريين هايديهم ضهره ؟ مش منطق
ثانيا : الجنود المصريين بيحتموا بدروع بلاستيكية , هل هناك عاقل يقول ان فى جنود هايحتموا من الرصاص بدروع بلاستيك؟ المنطق انهم كانوا بيحتموا من الحجارة اللى كانت بتلقى عليهم مش من الرصاص بتاع مسلحى حماس .
ثالثا : لو دققتوا فى الصورة هاتلاقوا ان وجوه المصريين متجهة فى غير جهة المسلح الفلسطينى بالاضافة ان المسلح ينظر لنفس الجهة التى ينظر لها الجنود يعنى التهديد الموجه للمصريين كان من نفس الاتجاة اللى المسلح الفلسطينى بيطلق تجاهه النار وان كان فى الهواء .
يبقى مالهاش لازمة السفالة وقله الادب والبذاءة وسب حماس بأعتبار انهم بيخوفوا المصريين

نيجى للصورة التانية

http://img170.imageshack.us/img170/3180/2224927815814cd5f772ozs5.jpg

الاستاذ المحترم بيقول ان الاسهم تشير لكلبين بوليسيين قتلى ولجنديين مصابين , دا مش هانختلف عليه , لكن اللى نختلف عليه انه كذب كذبه اخرى وقال انهم قتلوا واصيبوا برصاص حماس , جبتها منين يا محترم ؟ عرفت منين انهم قتلوا برصاص حماس؟مع ان كل وسائل الاعلام المحلية والعربية قالت ان الاصابات فى الجنود والكلاب البوليسية التى قتلت كانت بسبب الحجارة التى القاها فلسطينيون غاضبون , بتاع ايه تكذب وتقول انهم اصيبوا وقتلوا برصاص حماس ؟
بلاش دى , هل لو كانت حماس بتضرب رصاص على الجنود كان هايقتل كلبين بس ويصاب بعض الجنود؟ ولا كانت هاتبقى مجزرة ؟ خصوصا ان الجنود المصريين كانوا متسلحين بدروع بلاستيك وعصى ؟ ياريت يبقى فى منطق شوية وبطلوا تدليس , وبعدين لو نظرنا لأرضية الصورة هانلاقى الحجارة منتشرة على الاسفلت , معنى كده ان كان فى قذف بالحجارة فعلا مش ضرب رصاص والا اللى بيضرب رصاص هاييرمى حجارة ليه؟ لكن المدون المحترم بيكذب كل وسائل الاعلام وبيعتبرها بتغطى على الحدث الحقيقى معتمدا على تدليس فى الدليل الذى قدمه .
نأتى للصورة الثالثة :
http://img170.imageshack.us/img170/1924/2225718218d0dc6e88d5ooy0.jpg

الصورة دى بقى اعتمد عليها المدون اللوذعى علشان يعلق تحتها ويقول ان مقاتلى ( طبعا هو استخدم لفظ قذر ) حماس بيفتحوا الطريق بقوم السلاح , طيب اللى عاوز يفتح الطريق بقوة السلاح يا ذكى وهو شايل رشاش هايدخل وهو منزل فوهة رشاشه للأرض؟ بصوا يا جماعة للمسلح اللى على شمال المسلح الى بيشير عليه السهم , منزل سلاحه للأرض وبيبص فى عكس اتجاه الجنود المصريين , بقى دا داخل يفتح طريق بالقوة؟ حقا انها لا تعمى الابصار لكنها تعمى القلوب التى فى الصدور .

وبعد هذا التلفيق وجه هذا الشخص تهمة اخرى لحماس وهى انهم مسئولين عن حادث مهاجمة الجنود المصريين منذ ما يقارب السنة عند رفح , رغم ان المعابر وقتها كانت تحت سيطرة دحلان وابو مازن واللى ثبت وقتها ان بتوع فتح هما اللى ضربوا نار على المصريين , لكن مايكدبش ليه , هو حد فاكر حاجة ؟ وكلهم فلسطينيين والسلام .
اكتفى بهذا القدر من الرد على بذاءته وتدليسه وكذبه واقول انه مثال للعالمانى المصرى الحاقد على كل الحركات الاسلامية الذى لا يخجل من الكذب والتدليس ليس لشىء الا للطعن فى كل ما هو اسلامى .
والى لقاء اخر نناقش فيه ان شاء الله موقف العالمانيين من قضايا الامة الخارجية .

الأربعاء، 23 يناير، 2008

ماذا قدمت مصر للقضية الفلسطينية ؟

عادة الحكومة وعالمانيو المعارضة بتوع الليبرالية والحداثة والتقدم والكلام الكبير دا مابيتفقوش فى اى قضية زى اتفاقهم فى قضية فلسطين , وحججهم تكاد تكون متطابقة , احنا قدمنا ميت الف شهيد للقضية , احنا انطحنا حروب علشان خاطر القضية , احنا افتقرنا برضه علشان خاطر القضية .
لكن لو حبينا نرجع للتاريخ ونشوف ايه اللى قدمناه للقضة هانلاقى كل الكلام اللى بيقولوه هجص .
يعنى مثلا
قضية فلسطين بدأت بوعد بلفور سنة 1917 وبسقوم القدس فى يد الانجليز , من ساعتها لغاية دلوقتى مصر خاضت سبع حروب وهى على الترتيب :
1- الحرب العالمية الثانية :
ودى طبعا مالهاش دعوة بريحة القضية , مصر دخلتها متحالفة مع بريطانيا اللى منحت فلسطين لليهود قبلها بأقل من خمسة وعشرين سنة , وحاربت فيها مصر ضد قوات المحور فى الصحراء الغربية .
2- حرب فلسطين 1948 :
ودى بقى اللى تعتبر المشاركة الوحيدة لمصر فى المجهود الحربى المقدم للقضية الفللسطينية , مصر بعتت لواء واحد من الجيش قوامه حوالى خمسة الاف جندى بأسلحة خردة , وسقط من القوات المصرية حوالى 900 شهيد .
3- العدوان الثلاثى
ودا طبعا مالوش علاقة بالقضية الفلسطينية لأنها كانت حرب دفاعية لوقف الغزو الانجليزى الفرنسى الصهيونى .
4- حرب اليمن
واى واحد بيعرف جغرافيا برضه مش هايقول انها كانت علشان خاطر عيون القضية الفلسطينية , لكن الحرب دى استمرت سبع سنوات وسقط لمصر الاف الجنود واستنزفت الخزانة المصرية وفقدت مصر خلالها احتياطيها من الذهب تقريبا , لأنها كانت بتحارب عصابات وكمان بتحارب اموال السعودية وايران تخيلوا بقى التمن اللى مصر دفعته فى الحرب لكن مش موضوعنا .
5- وكسة 1967
الوكسة دى بقى مصر قدمت فيها حوالى العشرين الف شهيد واسير , وعلشان ماحدش يظن مجرد ظن انها كانت لأجل القضية ياريت يراجع الاحداث اللى ادت للحرب دى , ببساطة الحكام الاشاوس بتوعنا ( احنا العرب ) كانوا بيردحوا لبعض فى الاذاعات , اللى يقول ابن فلانة عمل واللى يقول ابن الخاين عمل واللى يقول ملك الجوارى والحريم سوى واللى يقول دا فلان مستخبى ورا القوات الدولية وخايف من اسرائيل , سخنوا على بعض وقالوا ياللا نحارب اسرائيل علشان ماحدش يفكر اننا خايفين , وكلهم خدوا على دماغهم والشعوب دفعت الاف الشهداء والجرحى علشان خاطرهم , واعظم خدمة قدمتها مصر للقضية تمثلت فى ضياع قطاع غزة بالاضافة لضياع الضفة والقدس .
6- حرب اكتوبر 1973
وطبعا دى كانت حرب تحريك للمسار التفاوضى المصرى الاسرائيلى علشان الكابتن كيسنجر يعرف يتعاطى مع القضية كانت لازم تسخن ( زى ما قال الفريق الشاذلى ) , وسخنت القضية برضه بعيدا عن القضية الفلسطينية
7- حرب تحرير الكويت
ودىكانت يا جماعة الخير علشان ماما امريكا وعمو بوش الكبير , ومقابلها اسقطت الديون العسكرية المصرية , ولا عزاء للقضية الفلسطينية

عرفتوا يا جماعة مصر قدمت اد ايه للقضية الفلسطينية ؟

الثلاثاء، 22 يناير، 2008

غزة ومصر

بسم الله الرحمن الرحيم

النهاردة طلعت مظاهرة نسوية من غزة , ووصلت لمعبر رفح وحاولوا يفتحوا المعبر , لكن رجال الامن الاشاوس الساهرين على حدود مصر الابية وقفوا لهم بالمرصاد , وتصدوا لكل من تسول له نفسه المساس بأمن مصر وسلامتها واستقرارها , وتم ردهم على اعقابهم , بس طبعا يا جماعة ماتقلقوش الامن المصرى كان كويس وحنين , والحكومة المصرية تعاملت بحكمة مع الوضع ومافضحتناش - على حد تعبير احدهم - وقدرت تحتوى الوضع بهدوء .
لكن بجد الحكومة مافضحتناش؟ علشان ايه؟ علشان ماضربتش نار على المتظاهرات؟ ولا علشان ماسحلتهمش ولا اعتدت على اعراضهم زى ماهى متعودة مع الشعب المصرى؟ طيب لما اشتركت مع اسرائيل فى حصار غزة مافضحتناش؟ ولما عجزت لغاية دلوقتى انها تفك الحصار قبل ما تاخد اذن ماما امريكا واسرائيل برضه مافضحتناشش؟ انا مش عارف هايحصل ايه لو مصر دخلت اغذية ووقود للقطاع؟ اسرائيل هاتضربنا بالخرزانة؟ ولا هاتذنبنا على السبورة؟
تعرفوا يا جماعة مصر بتبيع البترول والغاز لأسرائيل بكام؟ بسعر عشرة سنت لكل متر مكعب , ولمدة خمستاشر سنة , يعنى اقل من ربع التمن العالمى دلوقتى , وفى نفس الوقت خايفة من اسرائيل لو هى فكت الحصار عن غزة . شفتوا الحلاوة والشجاعة والحكمة؟ مصر بتمد اسرائيل بالغاز يعنى هما اللى محتاجينا وبرضه خايفين منهم وبنساعدهم فى حصار الفلسطينين فى غزة .
مش مهم يا جماعة المهم ان الحكومة مافضحتناش فى المعبر والاهم انهم مانجرفوش وراء التصرفات الجبانة بتاعت القيادة الفلسطينية فى غزة اللى استخبت ورا النسوان - برضه على حد زعم احدهم -