عادة الحكومة وعالمانيو المعارضة بتوع الليبرالية والحداثة والتقدم والكلام الكبير دا مابيتفقوش فى اى قضية زى اتفاقهم فى قضية فلسطين , وحججهم تكاد تكون متطابقة , احنا قدمنا ميت الف شهيد للقضية , احنا انطحنا حروب علشان خاطر القضية , احنا افتقرنا برضه علشان خاطر القضية .
لكن لو حبينا نرجع للتاريخ ونشوف ايه اللى قدمناه للقضة هانلاقى كل الكلام اللى بيقولوه هجص .
يعنى مثلا
قضية فلسطين بدأت بوعد بلفور سنة 1917 وبسقوم القدس فى يد الانجليز , من ساعتها لغاية دلوقتى مصر خاضت سبع حروب وهى على الترتيب :
1- الحرب العالمية الثانية :
ودى طبعا مالهاش دعوة بريحة القضية , مصر دخلتها متحالفة مع بريطانيا اللى منحت فلسطين لليهود قبلها بأقل من خمسة وعشرين سنة , وحاربت فيها مصر ضد قوات المحور فى الصحراء الغربية .
2- حرب فلسطين 1948 :
ودى بقى اللى تعتبر المشاركة الوحيدة لمصر فى المجهود الحربى المقدم للقضية الفللسطينية , مصر بعتت لواء واحد من الجيش قوامه حوالى خمسة الاف جندى بأسلحة خردة , وسقط من القوات المصرية حوالى 900 شهيد .
3- العدوان الثلاثى
ودا طبعا مالوش علاقة بالقضية الفلسطينية لأنها كانت حرب دفاعية لوقف الغزو الانجليزى الفرنسى الصهيونى .
4- حرب اليمن
واى واحد بيعرف جغرافيا برضه مش هايقول انها كانت علشان خاطر عيون القضية الفلسطينية , لكن الحرب دى استمرت سبع سنوات وسقط لمصر الاف الجنود واستنزفت الخزانة المصرية وفقدت مصر خلالها احتياطيها من الذهب تقريبا , لأنها كانت بتحارب عصابات وكمان بتحارب اموال السعودية وايران تخيلوا بقى التمن اللى مصر دفعته فى الحرب لكن مش موضوعنا .
5- وكسة 1967
الوكسة دى بقى مصر قدمت فيها حوالى العشرين الف شهيد واسير , وعلشان ماحدش يظن مجرد ظن انها كانت لأجل القضية ياريت يراجع الاحداث اللى ادت للحرب دى , ببساطة الحكام الاشاوس بتوعنا ( احنا العرب ) كانوا بيردحوا لبعض فى الاذاعات , اللى يقول ابن فلانة عمل واللى يقول ابن الخاين عمل واللى يقول ملك الجوارى والحريم سوى واللى يقول دا فلان مستخبى ورا القوات الدولية وخايف من اسرائيل , سخنوا على بعض وقالوا ياللا نحارب اسرائيل علشان ماحدش يفكر اننا خايفين , وكلهم خدوا على دماغهم والشعوب دفعت الاف الشهداء والجرحى علشان خاطرهم , واعظم خدمة قدمتها مصر للقضية تمثلت فى ضياع قطاع غزة بالاضافة لضياع الضفة والقدس .
6- حرب اكتوبر 1973
وطبعا دى كانت حرب تحريك للمسار التفاوضى المصرى الاسرائيلى علشان الكابتن كيسنجر يعرف يتعاطى مع القضية كانت لازم تسخن ( زى ما قال الفريق الشاذلى ) , وسخنت القضية برضه بعيدا عن القضية الفلسطينية
7- حرب تحرير الكويت
ودىكانت يا جماعة الخير علشان ماما امريكا وعمو بوش الكبير , ومقابلها اسقطت الديون العسكرية المصرية , ولا عزاء للقضية الفلسطينية
عرفتوا يا جماعة مصر قدمت اد ايه للقضية الفلسطينية ؟
الاشتراك في:
تعليقات الرسالة (Atom)
هناك تعليقان (2):
مصر قدمت كتيييييييييييييييييير اوى
المهم اللى يقدر
والمهم الفلسطينين يبطلو يضربو الوزرا بتوعنا فى الجوامع
سلام
بسم الله الرحمن الرحيم
يا استاذة صحفية روشة
اولا مصر لم تقدم شيئا من منطلق التفضل والتكرم والتعطف , وان كانت قدمت شىء فهذا فرض عليها وواجب علينا جميعا كمسلمين , واؤكد ان ما قدمته مصر مازال اقل بكثير جدا مما يجب عليها ان تقدمه , ولا تهم هنا المقارنة بين ما قدمته مصر وما قدمته دول اخرى , فى النهاية الكل مقصر .
وياريت حضرتك تقوليلى بعض هذا الكثير الذى قدمته مصر للقضية الفلسطينية .
إرسال تعليق