كفوا اذاكم عن هبة نجيب

ليه بنخرج الموضوع عن اطاره؟القضية لا ليها علاقة بالسعودية ولا مصر ولا القانون الدولى ولا عصبة الامم ولا الكلام الكبير دا كله , الموضوع خلاف اسرى بين اب وبنته يبقى بدل ما نحاول نصلح بينهم نحول المعركة بين قوى الحرية والرجعية والتطرف؟ ايه يا جماعة اللى بيحصل دا؟ حتى لو هى عايشة فى مصر عادى جدا فى مصر ان الاب بيفرض على بناته وابناؤه ايضا نطاق محدد مايخرجوش عنه , يا جماعة مايصحش اللى بيحصل دا هو ايه اللى الناس بتقوله دا؟ هبة نجيب ماحدش فى الدنيا دى بيحبها ولا بيخاف عليها زى ابوها واللى يقدر يكذب الكلام دا يقول , لو تعبت ولا حصل لها حاجة حد هايقف جنبها من اللى عاملين نفسهم ليبراليين وبتوع حقوق الانسان ؟ حد هايشيلها غير ابوها واهلها؟ ليه مش عاوزين ندرك ان فى جوانب كتير الشباب قد لا يدركها والاباء قلبهم بيتقطع علشان اولادهم بسببها؟ ليه بتفترضوا انه اب سىء والكل حوله لشيطان بيحبس بنته؟ مش هو دا اللى كان سبب وجودها فى الحياه؟ مش هو اللى اتغرب فى بلاد الله عشرات السنين علشان يوفر لها حياة كريمة؟ حتى وهى بتنتقده وعماله تهاجمه وتشرد فيه على الانترنت وبتستعدى عليه الحكومات العربية والغربية وامريكا والامم المتحدة لسة سايبها بتدخل الانترنت وبرضه هو اللى بيصرف عليها؟ فى ايه يا جماعة شوية عقل وتفكير , حاولوا تكفوا اذاكم عن هبة انتوا كده هاتدمروها , هاتدمروا دنيتها واخرتها كمان , حاولوا تصلحوا بدل ما تفسدوا , انا لله وانا اليه راجعون